Оскаровката стана амбасадор на Tiffany & Co. во кампања што го поврзува филмот со светот на накитот.
Американската актерка Натали Портман е новиот глобален амбасадор на Tiffany & Co., со што се официјализира партнерство што ја поврзува нејзината филмска кариера со естетиката на еден од најпрепознатливите светски брендови за накит.
Кампањата беше најавена со првите официјални фотографии, направени од фотографот Гордон фон Штајнер во легендарната продавница на Tiffany на Петтата авенија во New York City. Во новите визуелни материјали, Портман носи препознатливи дизајни од колекциите HardWear, T и Knot, како и парчиња од линијата Sixteen Stone, дизајнирана од Жан Шлумбергер.
Во рамките на кампањата се потсетува и на историската врска на брендот со значајни јавни личности. Поранешната прва дама Џеки Кенеди Онасис била сопственик на прстен од колекцијата Sixteen Stone, додека Џон Ф. Кенеди помладиот ѝ предложил брак на Каролин Бесет со прстен од истата линија.
Освен новата улога, Портман најавува и активна филмска година во која се очекуваат премиерите на романтичната комедија „Good Sex“ во режија на Лена Данхам и филмот „The Gallerist“, во кој ќе глуми заедно со Џена Ортега и Чарли XCX.
Со ова партнерство, Tiffany & Co. продолжува да ја позиционира уметноста на изработката на накитот како дел од современиот културен и филмски контекст, додека Портман дополнително ја зацврстува својата улога како влијателна фигура на пресекот меѓу филмот и модата./M.M.
