Од луксузно крзно и блескави светки, преку пердуви и наметки со реси, па сè до фин твид и бунтовни маици со графички принтови – новата линија на модната куќа Valentino носи енергија во која повеќе секогаш значи повеќе“.
Најновата Cruise 2027 колекција на модната куќа Valentino, ја откри целосната сила на креативната визија на Алесандро Микеле, успешно спојувајќи го историскиот гламур, по кој овој римски бренд е препознатлив ширум светот, со естетиката на новиот креативен директор. Крајниот резултат е линија која истовремено е исклучително префинета, но и ексцентрична.
Твид, графички принтови и незапирливата енергија на филозофијата повеќе е повеќе“
Линијата на колекцијата се движи низ неверојатно широк стилски спектар: од строго кроени и елегантни твид-комплети, преку лежерни плетени џемпери и спортски капи, па сè до впечатливи маици со остри графички принтови. Со спојување на навидум неспоиви елементи, создадена е современа дефиниција на уличниот луксуз, која директно комуницира со помладата и побунтовна генерација љубители на високата мода.
Моден колаж од пердуви, светулки и реси
Од другата страна на стилскиот спектар, вечерниот сегмент на колекцијата носи драматичен гламур. На сцената доминираат парчиња прекриени со слоеви од светки, детали од раскошни пердуви, како и екстравагантни наметки со долги реси кои создаваат впечатлива игра на движење. Контрастните дезени, дивите текстури и незапирливата максималистичка енергија беа главната моден акцент, потврдувајќи дека Valentino под водство на Алесандро Микеле влегува во ера во која строгите правила и минимализмот едноставно повеќе не постојат./М.М.
