Новата химна за Светското првенство ги освои светските топ-листи, а по распродадената американска турнеја следуваат спектакуларни концерти во Европа и на Блискиот Исток.
Првата недела од август донесе уште една потврда за глобалната доминација на Шакира. Химната „Dai Dai“, снимена во соработка со Burna Boy за Светското фудбалско првенство, моментално е број еден на глобалните топ-листи на Spotify и Billboard надвор од САД, додека на американската листа Billboard Hot 100 се искачи на 17. место. Истовремено, според бројот на стримови се наоѓа на 15. позиција, а во дигиталната продажба го зазема второто место.
Покрај музичкиот триумф, потврдено е дека целиот авторски приход што и припаѓа на Шакира од оваа песна ќе биде дониран за хуманитарни цели, во фондот FIFA Global Citizen, наменет за поддршка на образованието на децата ширум светот.
На спектакуларниот настап, одржан на стадионот „Њујорк – Њу Џерси“, пејачката носеше ексклузивна креација изработена специјално за неа од модната куќа Roberto Cavalli, под креативно водство на Фаусто Пуљизи. Сценскиот костим, инспириран од препознатливиот мотив „Ray of Gold“, беше во впечатливи розови и жолти нијанси и се состоеше од боди со длабоко вкрстено деколте. Најимпресивниот детал, кој подразбира и поврзување со високата мода, беше рачната изработка – целиот костим беше украсен со повеќе од 200.000 Swarovski кристали.
Паралелно со триумфот на Светското фудбалско првенство, огромен успех бележи и актуелната турнеја „Las Mujeres Ya No Lloran World Tour“, која официјално влезе во историјата како најуспешна латиноамериканска турнеја на сите времиња. Со заработка од повеќе од 436 милиони долари, Шакира собори и Гинисов рекорд.
Откако кон крајот на јули ја заврши целосно распродадената серија концерти низ арените во Соединетите Американски Држави, турнејата сега се сели во Европа. Европскиот дел започнува во Мадрид, каде што Шакира ќе одржи серија концерти во текот на септември и октомври. Потоа следуваат настапи на Блискиот Исток – од Доха, на 18 ноември, до спектакуларен концерт кај пирамидите во Гиза, во близина на Каиро, на 28 ноември.
И додека „Dai Dai“ бележи стотици милиони прегледи на социјалните мрежи и стриминг-платформите, јавноста забележува дека овој планетарен успех има и своја симболична димензија.
По годините исполнети со лични разочарувања, јавниот развод со Жерар Пике, судските спорови со шпанските даночни власти и периодот во кој многумина ја отпишаа како музичка сила, Шакира повторно се издигна на самиот светски врв. Денес нејзиниот најсилен одговор не се интервјуата, ниту јавните препукувања, туку бројките – рекордните стримови, распродадената светска турнеја, глобалните музички топ-листи и статусот на една од највлијателните поп-ѕвезди на денешницата.
Фото: Shakira Instagram, Linkedin, Sony Music
