Градежните работи ќе започнат овој месец, а 76-метарската порта треба да биде завршена до јануари 2029 година.
Монументалната триумфална порта со неокласичен дизајн, која треба да биде изградена во Вашингтон, го доби одобрението на американската Комисија за ликовни уметности. Проектот на архитектонското студио „Harrison Design“ предвидува порта висока 76 метри, која ќе биде поставена на сообраќаен круг на крајот од меморијалниот мост Арлингтон, на јужниот брег на реката Потомак. Градежните работи се очекува да започнат овој месец, а според плановите на администрацијата на Трамп, изградбата треба да биде завршена до јануари 2029 година, пред завршувањето на неговиот претседателски мандат. Станува збор за подготвителни градежни работи, пред официјалното започнување на изградбата.
Официјалното име на проектот е „Триумфална порта на Вашингтон“, но поради тесната поврзаност со Доналд Трамп таа веќе го доби прекарот „Арката на Трамп“, како алузија на Триумфалната порта во Париз. Со своите 76 метри, вашингтонската порта би била речиси 30 метри повисока од парискиот монумент.
Портата ќе има три нивоа наменети за посетителите. На најниското ниво се предвидени простории за влез и продажба на билети, над него ќе има галериски простор, а во близина на врвот е планирана платформа за набљудување. Проектот предвидува посетителите да можат да се искачат високо над градот и да ги набљудуваат околните знаменитости.
Архитектите наведуваат дека целта на проектот е да се одбележат 250 години американска историја, слобода и иднина. Доналд Трамп, говорејќи по одобрувањето, ја оправда изградбата со оценката дека Вашингтон е „единствениот важен и голем град“ кој нема ваков монумент.
Триумфалната порта е дел од пошироките планови на Трамп за промена на изгледот на Вашингтон. Меѓу другите проекти се и планираната балска сала во Белата куќа и промената на изгледот на дното на Рефлектирачкиот базен, кои во моментот наидуваат на правни и политички пречки./M.M.
Дизајнирано од Harrison Design
