Со височина од 377 метри Ciel Dubai Marina во Дубаи е највисоката хотелска зграда во светот. Располага со 857 хотелски соби, осум кафулиња и ресторани, спа-центар, фитнес-центар и содржини наменети за деца.
Облакодерот е поставен врз бело обложен подиум и има карактеристична стеснета форма – се стеснува и кон врвот и кон подножјето. Заоблените фасади се обложени со ладно свиткани стаклени панели, чија форма е дизајнирана да одговара на доминантните воздушни струења. Хотелот го презеде рекордот од Gevora Hotel во Дубаи, висок 356 метри
Еден од највпечатливите архитектонски елементи се наоѓа во горниот дел од зградата. Отворот низ 82-катниот облакодер, визуелно налик на окото на игла, во себе сместува infinity базен на 76-тиот кат, со панорамски поглед кон Dubai Marina.
Над отворот се наоѓа јавна набљудувачка платформа, додека под него се протега 300 метри висок атриум, поделен на низа тераси. Токму овој вертикален простор претставува еден од клучните концепти на архитектурата на Ciel Dubai Marina.
Во срцето на хотелот се наоѓа 300-метарски атриум, во кој вертикално се распоредени уредени „sky gardens“, односно воздушни градини, со природно проветрени тераси распоредени низ височината на зградата.
NORR е архитектонско, инженерско и планерско студио основано во 1938 година, со канцеларии во повеќе градови во Канада, САД и Велика Британија.
Ciel Dubai Marina е уште еден пример за амбицијата на Дубаи да ја трансформира својата препознатлива силуета со нови архитектонски рекорди. /M.M.
Фото: Ciel Dubai Marina / IHG Hotels & Resorts
