Во чест на Денот на планетата Земја, во Кинотека на Македонија се одржа проекција и панел-дискусија со експерти, при што уметноста беше претставена како најмоќниот медиум за еколошка свест.
Со проекција на документарниот филм *TerraForma*, во Кинотека на Македонија беше одбележано пролетното издание на ECOSCOP – иницијатива во рамките на Мрежата на филмски фестивали од јадранскиот регион. Настанот, кој се одржа на 22 април, симболично се совпадна со Денот на планетата Земја, а организаторите ја искористија можноста да испратат силна порака за потребата од заштита на животната средина.
Според соопштението на ИФФК „Браќа Манаки“, директорот на фестивалот Димитрија Доксевски ја отвори вечерта со повик до публиката по проекцијата да присуствува на панел-дискусијата со екологот Ханес Јекл и Ѓорѓи Митревски од организацијата „Еко-свест“.Филмот *TerraForma* ја раскажува приказната за трансформацијата на изолиран вулкански остров во тропски рај – процес кој симболично го рефлектира влијанието на човештвото врз природата. Приказната ја отвора темата за опасноста од т.н. „тераформирање“ на пејзажите, каде човекот со својата амбиција го менува природниот тек и суштината.
На панелот, Ханес Јекл, ко-основач на „Man and Mountain“, говореше за иницијативата „Генералка викенд“, која за пет години пораснала од 10 општини и 1.000 волонтери до национален еко-движечки мотор со 81 општина и 45.000 волонтери. Јекл истакна дека целта е Македонија да се исчисти од отпад до 2031 година и најави следна акција за чистење на Аквадуктот на 9 мај.
– Ова е наша земја, и ние имаме капацитет да ја направиме подобро место за живеење – рече Јекл, нагласувајќи дека културата и уметноста имаат голем потенцијал да го разбудат еколошкото сознание кај јавноста.
Во продолжение, Ѓорѓи Митревски од „Еко-свест“ посочи дека нивната организација веќе пет години соработува со уметници, независни културни центри и фестивали во обид, преку креативни медиуми, да го пренесе значењето на заштитата на природата.
– Уметноста е можеби најмоќниот медиум за ширење на еколошката порака – истакна Митревски. Тој нагласи дека Балканот, вклучувајќи ја и Македонија, сè уште е дом на недопрени речни екосистеми, какви што веќе не постојат во голем дел од Европа, и токму тоа е борбата што тие ја водат.
За оние кои не беа во можност да присуствуваат на проекцијата, филмот *TerraForma* ќе биде достапен онлајн во наредната недела на платформата : https://ondemand.kinomeetingpoint.ba/.
Фотографија: Татјана Ранташа
