По милионите отследувања, активистите тргнаа по спонзорите и деловната империја на Кардашијан. – Како се случи од модна икона Ким да стане симбол на #Blockout кампањата
Ким Кардашијан и нејзиниот бренд Skims се соочуваат со последиците од масовната дигитална кампања #Blockout, која доби замав по годишната Мет Гала и резултираше со значителен пад на бројот на следбеници на социјалните мрежи. Според достапните податоци, Кардашијан досеа има изгубено повеќе од 7,2 милиони следбеници на Instagram, додека профилот на Skims останал без околу 22.000 следбеници.
Кампањата #Blockout се појави како форма на дигитален протест насочен кон славните личности и милијардерите, при што корисниците масовно ги блокираат и отследуваат нивните профили со цел да го намалат нивниот алгоритамски досег и рекламното влијание.
Наместо повлекување од јавноста, Skims продолжи со интензивни маркетиншки активности, вклучувајќи спонзорирани објави и сезонски промоции, потег што предизвика критики од дел од јавноста. Истовремено, компанијата се потпира на својата широка мрежа на големопродажни партнери и луксузни стоковни куќи, со што се обидува да ја намали зависноста од моменталните трендови на социјалните платформи.
Во меѓувреме, Ким Кардашијан одговори на критиките со нова провокативна модна кампања во соработка со модната куќа Maison Margiela. На серија фотографии таа се претстави под концептот „Скршена кукла“ („Broken Doll“), продолжувајќи да ја користи контроверзноста како дел од својата медиумска стратегија. Нејзиниот деловен тим засега не го коментира јавно губењето на милионите следбеници.
Иако намалениот досег може да влијае врз цената на некои од спонзорираните објави, аналитичарите сметаат дека краткорочната финансиска стабилност на Skims не е сериозно загрозена. Компанијата веќе се позиционираше како глобален моден бренд со вредност од повеќе милијарди долари. Сепак, поголем предизвик може да претставува односот на помладите генерации, особено припадниците на генерацијата Z, кои сè почесто ги гледаат Кардашијанови како симбол на екстремното богатство и корпоративната моќ.
Активистичките групи, меѓу кои и организацијата Everyone Hates Elon, најавуваат дека протестите нема да завршат со реакциите околу Мет Гала. Нивниот фокус се префрла кон долгорочен финансиски притисок врз влијателните личности и нивните деловни партнери.
Меѓу следните цели на активистите се најавената соработка меѓу Nike и Skims, како и луксузните брендови Dolce & Gabbana, Fendi и Swarovski, со кои семејството Кардашијан соработува. Активистите повикуваат на организирани бојкоти и масовно блокирање на спонзорираните содржини на социјалните мрежи, со цел дополнително да се намали нивното комерцијално влијание.
Кампањата, според организаторите, има за цел да испрати порака дека компаниите и брендовите треба да сносат одговорност за партнерствата што ги градат со јавни личности кои, според нив, го претставуваат системот на екстремна економска нееднаквост.
Фото: @kimkardashian
