Способноста да се “трансформира” го прави симбол на минливоста и на природната убавина.
Во скриените предели на планинските шуми во северна Јапонија и Кина, расте цвет што изгледа како да е од друг свет. На суво време е едноставен, бел, речиси незабележителен, но кога дождот ќе го допре, се случува магија – неговите ливчиња стануваат целосно проѕирни. 
Овој ботанички феномен, познат како прозирен или стаклен цвет (*Diphylleia grayi*), плени со својот неочекуван визуелен ефект и ја поттикнува љубопитноста на ботаничарите и на љубителите на природата ширум светот.
Станува збор за повеќегодишно растение од семејството *Berberidaceae*, која природно вирее во влажните, студени и сенчести предели на Јапонија, Кина и рускиот остров Сахалин. Цветовите се појавуваат во доцна пролет, со бела боја и едноставен изглед. Но нивната вистинска убавина се открива кога ќе се навлажнат – ливчињата стануваат проѕирни, при што нивната венска структура се појавува како фина мрежа, создавајќи ефект налик на скелет.
Проѕирноста на цветот не е резултат на промена во пигментацијата, туку на промената во рефлексијата на светлината низ влажната структура на клетките. Кога ливчињата се суви, воздухот меѓу клетките ја расејува светлината и тие изгледаат бело. Кога впиваат вода, клеточните празнини се исполнуваат со течност, што дозволува светлината да помине низ нив – и така ливчињата стануваат стаклести.
Интересот за *Diphylleia grayi* се прошири и преку научните кругови, каде што ботаничарите го истражуваат неговиот состав и адаптациски механизми. Во минатото, се вршени испитувања на екстракти од ова растение поради присуство на соединенија со можен биолошки ефект.
Скелетниот цвет не е само визуелна сензација, туку и потсетник на тоа колку е фасцинантна природата кога сме доволно трпеливи да ја набљудуваме внимателно. Во време на дигитална преоптовареност, ова растение нуди тивка, магична лекција за трансформација и убавина./М.М.
