Две децении по првиот моден „земјотрес“, новата соработка носи одржлива мода, култни парчиња и носталгија од 90-тите – стартот е на 7 мај
Шведскиот моден гигант H&M ја откри првата визија од долгоочекуваната нова соработка со британската дизајнерка Stella McCartney, точно дваесет години по нивниот прв заеднички проект кој остави силен белег во модната индустрија. Колекцијата официјално ќе биде пуштена во продажба на 7 мај, а уште сега се најавува како потенцијален глобален хит.
Првата соработка во 2005 година, која следеше по историскиот успех на партнерството со Karl Lagerfeld, го отвори патот за трендот на „дизајнер за масовен пазар“. Новата колекција, пак, оди чекор понатаму – не само што ја слави 25-годишната кариера на Мекартни, туку и силно ја потенцира нејзината долгогодишна посветеност на одржливата мода.
Линијата опфаќа женска облека, чанти, обувки и накит, при што концептот се базира на спој на минатото и сегашноста. Препознатливите кроеви како oversized кошули, тренч мантили и прецизна кројачка техника се комбинирани со архивски елементи – впечатливи принтови, слоган-маици и разиграни детали што ја одбележаа раната фаза од кариерата на дизајнерката.
Во изјавата за колекцијата, Мекартни нагласува дека станува збор за лична модна ретроспектива – патување низ нејзиниот дизајнерски развој, во кое се испреплетуваат современи класици и нејзини омилени парчиња од минатото. Таа ја опишува колекцијата како разиграна, силна, блескава и софистицирана.
Клучен аспект е одржливоста. Материјалите вклучуваат органски памук и волна, како и иновативни решенија како ткаенини добиени од индустриска пченка и рециклирани растителни масла. Дел од парчињата се украсени со елементи изработени од рециклирано стакло, што дополнително ја зацврстува еколошката порака.
Меѓу главните модни адути се издвојуваат класичен тренч мантил, чипкан мини фустан со кристални детали, пижама-комплети, плетени фустани со препознатлив синџир, како и впечатливи вечерни креации.
Креативната советничка на H&M, Ан-Софи Јохансон, оценува дека колекцијата ја следи трансформацијата на Мекартни – од млад, бунтовен глас во модата до автор на безвременски дизајн. Според неа, секое парче носи силна приказна и јасен идентитет.
Цените се движат од пристапни 29,99 евра за основни парчиња до околу 299 евра за премиум модели, што ја задржува препознатливата стратегија на H&M – луксузен дизајн достапен за пошироката публика.
Со оглед на историјата на ваквите соработки, модните познавачи веќе предвидуваат сценарио во кое колекцијата ќе исчезне од полиците за рекордно кратко време, претворајќи го 7 мај во еден од најжешките датуми на модниот календар.
Фото: H&M
