Од спој на традицијата и функционалноста до суптилни детали инспирирани од Шангај, јубилејот го слави модното наследство кое успешно ги предвидува потребите на современата жена.
Италијанската модна куќа Max Mara одбележува три четвртини век постоење во Шангај, спојувајќи ја својата богата традиција со визијата за иднината. Под слоганот „75 Years of Future“ („75 години иднина“), брендот го прославува јубилејот што означува 75 години врвно кројачко мајсторство, технологија, иновации и успешно предвидување на потребите на современата жена.
„The Max!“
Централниот столб на прославата е единствената изложба „The Max!“, поставена во престижниот Long Museum во Шангај. Изложбата ја курира познатиот моден историчар Оливие Сајар (Olivier Saillard), во соработка со Гаел Мамин (Gaël Mamine). Осмислена како „жив архив“, таа ја реконструира атмосферата на официјалната библиотека и архива на куќата (BAI – Biblioteca e Archivio d’Impresa).
Изложбата не претставува само ретроспектива, туку и отворен простор што постојано се менува, повикувајќи ги посетителите на емотивно патување низ седум децении создавање универзални модни парчиња, сакани и носени ширум светот.
„Kinetic Chic“
Во истиот музејски простор беше одржана и ревијата за колекцијата Resort 2027, насловена „Kinetic Chic“. Креативниот тим на брендот истакнува дека колекцијата не е едноставен поглед кон минатото, туку манифест што му оддава почит на наследството, додека цврсто гледа кон иднината.
Колекцијата го носи препознатливиот спој на функционалност и луксуз, наменет за динамичниот начин на живот. Нејзиниот визуелен идентитет се потпира на графички мотиви и геометриски шари од минатото на брендот, оживеани со нова енергија.
Во палетата доминираат препознатливите Max Mara нијанси: камила, коњак и каки, како и шампањ, црна и бела боја, надополнети со култната заситена Max Mara црвена.
Силуетите се елегантни, чисти и прилагодени на различни стилови на изразување, со неочекувани детали како дискретниот сјај на светки на едноставни, шик џемпери. 
Колекцијата има изразен интернационален карактер, но содржи и суптилни омажи на градот домаќин.
Традиционалниот шангајски кинески стил е вткаен во модели како фустани од мерино волна инспирирани од кројот на cheongsam, прошиени свилени јакни и кошули од памучен поплин со традиционално pankou закопчување.
Од модната куќа порачуваат дека ова е прослава на 75 години стил кој се живее и се сака, а кој целосно ѝ припаѓа на жената што го носи – а отсега, во одредени изданија, и на мажот.
Детали за активностите поврзани со јубилејот можат да се проследат на сајтот на модната куќа (https://rs.maxmara.com/editorial/resort).
Фото: Max Mara
