Неодамнешното клиничко испитување на лекот покажа такви ветувачки резултати, што Управата за храна и лекови на САД (FDA) штотуку ја одобри неговата употреба за пациенти на возраст на и над 12 години.
Губењето на косата условено од автоимуна состојба, алопеција ареата, може да биде реверзибилно доколку заболените неколку месеци го пијат новиот лек, објави Science alert магазинот, пренесувајќи информација за студијата објавена во The Lancet, како и веста за одлуката на FDA.
Алопеција се карактеризира со губење на косата на скалпот, лицето или телото. Тоа се случува кога имунолошкиот систем почнува да ги напаѓа фоликулите на косата што може да има сериозни ментални и емоционални влијанија. Некои пациенти со тешки форми на болеста ја губат целата коса на скалпот, трепките, веѓите, како и остатокот од влакната на телото, состојба позната како alopecia universalis. Ваквите случаи имаат тенденција да бидат особено отпорни на достапните третмани, но новиот лек наречен ritlecitinib може да помогне тоа да се промени.
Имено, во клиничките испитувања во втората и третата фаза лекот промени до 80 проценти од опаѓањето на косата на скалпот кај речиси четвртина од сите пациенти и досега се чини дека е единствен ефикасен третмани за тешка алопеција кој добро се поднесува. Неговото одобрување исто така го прави единствениот третман достапен и за децаод и над 12 години.
Во наредните недели, ritlecitinib ќе им биде достапен на пациентите од Pfizer под брендот LITFULO™, а препорачаната доза е 50 милиграми дневно.
„Додека пациентите можат да развијат симптоми на алопеција ареата на која било возраст, повеќето луѓе почнуваат да покажуваат знаци во тинејџерските, дваесеттите или триесеттите години“, вели дерматологот Brittany Craiglow од Yale Универзитетот, во соопштението за печатот од Pfizer.
LITFULO е особено важна опција за третман за помлади пациенти со значително губење на косата, кои често се борат со таква видлива болест. Во неодамнешното клиничко испитување на LITFULO, беа вклучени повеќе од 700 пациенти со алопеција, од 18 нации. Секој учесник имал опаѓање на косата на половина од скалпот помалку од една деценија, а половина од групата доживеале целосно губење на косата на скалпот.
Во споредба со оние кои земале плацебо, пациентите кои земале 50 милиграми LITFULO дневно покажале значителен повторен раст на косата. Севкупно, околу 23 отсто од пациентите третирани со лекот, по шест месеци покажале 80 отсто или повеќе покриеност на скалпот со влакна, во споредба со 1,6 отсто од оние кои земале плацебо.
Оние пациенти кои ја имале болеста подолго време имале тенденција да покажат послаби резултати, што сугерира дека лекот е најефикасен во раните фази на избувнувањето на алопеција, кое може да трае со месеци или до една година.
Точниот начин на кој LITFULO го намалува опаѓањето на косата и го промовира растот на косата сè уште е донекаде непознат, но се смета дека како ензимски инхибитор, лекот ги спречува имуните клетки да иницираат специфичен сигнален пат кој може да предизвика воспаление во фоликулите.
Повторното растење на косата забележано во клиничките испитувања сугерира дека овие фоликули на косата може да се обноват, можеби со враќање на нивните „имуни привилегии“.
Овој пак механизам на дејство може да влијае на вообичаената функција на имунолошкиот систем, што значи дека пациентите на LITFULO можат да бидат поподложни на инфекции и болести. Во досегашното клиничко испитување, несаканите ефекти се сметаат за минимални и податливи./М.М.
