Tommy Hilfiger и Celine се најновите имиња кои на кинескиот пазар лансираа линии на додатоци за домашните миленици. Зошто е толку профитабилен овој пазар и од каде таков интерес кај модните брендови за учество на пазар вреден 66 милијарди долари, анализира кинескиот весник Jing Daily.
Од Tommy Hilfiger ги објавија плановите за соработка со партнерот носител на лиценцата Kanine во лансирањето на својата прва колекција за миленичиња која треба да излезе во јануари 2023 година.
Од Hermès to Fendi – сите познати брендови почнаа да нудат колекции за кинеските четириножни пријатели. На почетокот на овој месец, Celine го ангажира кучето на креативниот директор Hedi Slimane, Elvis, во кампањата за додатоци за домашни миленици. Со проширување на категориите на производи, овие брендови се обидуваат да го задоволуваат растечкиот интерес на кинескиот пазар за производи за домашни миленици.
За интересот најдобро говорат евидентираните речиси 100 милиони прегледи на Weibo, #howtoachievepetpamperingfreedom# , како и проценките според кои до 2023 година пазарот за домашни миленици ќе вреди 66,8 милијарди долари.
Според пазарната анализа на The Jing Take неколку фактори го поттикнуваат растот на кинеската економија „чонгву“ (宠物经济). Прво, зголемените нивоа на приходи и подобрениот животен стандард, значат дека повеќе семејства можат да си дозволат да имаат домашни миленици. Потоа и осамената популација која старее посвојува миленичиња за да им прави друштво. Од 2020 година, Кина има повеќе од 288 милиони луѓе на возраст над 60 години, што претставува 20,4 отсто од населението.
Освен тоа и растечкиот тренд на луѓе што живеат сами, а се грижат за околината и за животните, придонесе за се поголема побарувачка на додатоци за миленичиња. Оваа група на самци, кои во просек се млади луѓе и кои и самите многу трошат, се целната група на европските и на светските брендови.
Извештајот за потрошувачката на младите во Кина за 2019-2020 година покажува дека процентот на купувачи на возраст од 18-25 години се очекува да ја зголеми нивната потрошувачка за производи за домашни миленици за 5,89 проценти, што е повисоко и од националниот просек (3,73 проценти)./М.М.
