Модното шоу на Carolina Herrera за есен-зима 2024-2025 година го надмина обичното, не само во неверојатниот приказ на високата мода, туку и во наративот за силата и за самодовербата на современата, деловна жена.
Wes Gordon, креативната сила на брендот Herrera, визијата за силната деловна жена ја материјализира во колекција која зрачи самодоверба и виталност, истовремено оддавајќи почит на иконската женска естетика на Carolina Herrera, венецуелската дизајнерка која во 1980-тата ја има основано истоимената модна куќа.
Ревијата, одржана во рамките на модната недела во Њујорк (New York Fashion Week), претставува хармоничен спој на познати мотиви и смели иновации. Елементите со потпис, како што се цветните дезени и обемните ракави, кои потсетуваат на безвременскиот стил на г-ѓа Herrera, беа споени со модерни, архитектонски дизајни.
Имено, Gordon воведе рационализирани силуети и неочекуван избор на ткаенина, како темен тексас, додавајќи современи завршници на колекцијата.
Вечерната облека, олицетворение на елеганција и привлечност, суптилно е трансформирана.
Традиционалните фустани со обрач, некогаш натоварени со слоеви од тул, повторно се обмислени со современ шмек – сестрани и достапни.
Спротивно на тоа, блескавите силуети со длабоки деколтеа предизвикаа чувство на мистерија и софистицираност, потсетувајќи на иконските фигури од 80-тите и 90-тите, на почетоците на модната куќа.
Основната порака на дизајнерот е дека самодовербата нема граници: без оглед дали се работи за прифаќање на женственоста со неоправдана смелост или предизвикување на општествените норми со бестрашна решителност, жената во најновата колекција на Carolina Herrera ја отелотворува силата, убавината и индивидуалноста.
Модниот филм од ревијата е на следниот линк:
