Новиот женски парфем на Mercedes-Benz носи цветно-свежа композиција со цитрусни ноти, дрвенести акорди и мошус, во приказна за самоуверената жена.
Самоувереноста има свој мирис, а Mercedes-Benz ја претвори во нова парфемска креација. I am Mercedes е наменет за жените кои не се плашат да бидат свои и кои самостојно го избираат патот по кој ќе тргнат.
Парфемот го креира Софи Лабе и е со композицијата што се отвора со свежи ноти на нероли, бергамот и розов бибер. Во срцето на парфемот се развиваат цветот на портокал, јасмин и иланг-иланг, создавајќи блескава и женствена цветна нота. Во основата се ванилата, дрвенестите акорди и мошусот, кои му даваат топлина, мекост и сензуална длабочина. Така се добива мирис кој ја спојува свежината со топол и елегантен карактер.
И самото шише е замислено како мал драгоцен предмет. Стаклото со дијамантски рез, централниот елемент инспириран од ѕвезда на Mercedes-Benz и металик-розовиот капак се суптилен омаж на автомобилското наследство на брендот. Нежната лососово-розова нијанса на парфемот дополнително ја нагласува неговата сензуалност, додека рачно испишаното I am Mercedes на вратот на шишето му дава личен печат.Цената на I am Mercedes зависи од дистрибутерот и од пакувањето, а понудите на европските онлајн-продавници почнуваат од околу 69 евра.
Приказната за „I am Mercedes“ се потпира на историјата на жените поврзани со светот на автомобилската индустрија. Името Mercedes е според Мерцедес Јелинек, ќерката на австрискиот трговец Емил Јелинек, кој бил значаен промотор на автомобилите на тогашната компанија Daimler. Уште пред тоа, во 1888 година, Берта Бенц испишала важна страница на историјата кога со автомобилот на својот сопруг Карл Бенц тргнала на долго патување од Манхајм до Пфорцхајм. Токму овие приказни се надоврзуваат на пораката на новиот парфем според кој жената сама го избира својот пат.
Според базата Fragrantica, Mercedes-Benz досега има регистрирано 51 парфем, а првите изданија се појавиле во 2012 година.
Фото: Mercedes-Benz
