Секој трипептид е пептид, но не секоја формула со пептиди содржи трипептид
Трипептидите се новата состојка на која сè повеќе внимание ѝ посветува козметичката индустрија. Станува збор за специфичен вид пептиди кои, според дерматолошките и естетските експерти, можат да ги поддржат природните процеси на обновување на кожата, производството на колаген и нејзината цврстина.
Трипептидите се специфичен вид пептиди составени од три меѓусебно поврзани аминокиселини. За разлика од мултипептидните формули, во кои различни пептиди се комбинираат за да дејствуваат истовремено, трипептидот претставува една конкретна пептидна структура. Тоа значи дека секој трипептид е пептид, но не секоја формула со пептиди содржи трипептид.
Како дејствуваат?
Пептидите во кожата функционираат како своеобразни гласници. Со стареењето, природните процеси на обновување и комуникација во кожата стануваат помалку ефикасни, а одредени трипептиди можат да ги имитираат сигналите што го поттикнуваат природниот процес на поддршка на производството на колаген и зајакнување на структурата на кожата.
Особено се интересни за нега на кожа со видливи знаци на стареење. Наместо едноставно да создаваат привремен ефект на мазна и сјајна кожа, тие имаат за цел да ги поддржат природните механизми за обновување.
Трипептиди или обични пептиди?
Главната разлика е во структурата. Трипептидот содржи три аминокиселини, додека другите пептиди можат да содржат различен број аминокиселини. Од нивната структура зависи и каков сигнал испраќаат и каква функција имаат во формулата.
Но, поголемиот број аминокиселини не значи автоматски и подобар или поефикасен производ, така што е поважно да се избере соодветната пептидна технологија во зависност од посакуваниот резултат.
Што можат да направат за кожата?
Меѓу потенцијалните придобивки од добро формулираните производи со пептиди се поцврст изглед на кожата, подобра текстура, поддршка на бариерата на кожата и намалување на видливоста на брчките.
Особено важна е нивната улога во долгорочната нега. Наместо да создаваат само краткотраен козметички ефект, пептидните формули можат да придонесат за поздрав изглед и поголема отпорност на кожата со текот на времето.
Бидејќи трипептидите имаат релативно мала молекуларна структура, во зависност од конкретната формула можат да овозможат подобра апсорпција во кожата.
Кому му се препорачуваат?
Производите со трипептиди особено им се наменети на оние кои сакаат да ги ублажат фините линии, брчките, губењето на цврстината и промените во текстурата на кожата. Тие можат да бидат интересни и за оние кои сакаат превентивно да се грижат за кожата.
Сепак, експертите советуваат да не се избира производ само според рекламните тврдења. Ефикасноста зависи од комбинацијата на пептидната технологија, квалитетот на формулата, клиничкото тестирање и усогласеноста на различните состојки.
Во Македонија веќе можат да се најдат козметички производи со трипептидни формули, па овој тренд не е достапен само преку нарачки од странство. Меѓу нив се и производи на The Ordinary, како Matrixyl 10% + HA, со палмитоил трипептиди, како и Multi-Peptide + Copper Peptides 1%, кои се достапни преку повеќе македонски онлајн аптеки и продавници за козметика. За оние што сакаат поширок избор, европските онлајн продавници нудат дополнителни формули, за кои, секако, е потребна и сеопфатна проверка./М.М.
