На тековната Модна недела Лондон (London Fashion Week) видно место завзеде настапот на кинеските дизајнери. Имено, на прославите на 40-годишнината од Лондонската модна недела, кинеските модни таленти реализираа извонредна модна презентација на која дизајнерите и модните куќи, како Huishan Zhang, Consistence и Mithridate ги претставија своите колекции за пролет/лето 2025 година. Настанот го потврди и истакна растечкото влијание на кинеските дизајнери на глобалната сцена.
Consistence, бренд со седиште во Шангај, основан од Tien Lu и Fang Fang, дебитираше на LFW со својата прва колекција на женска облека, насловена како Useless but Fabulous. Позната по своите одржливи дизајнерски практики, колекцијата имаше прилагодени костуми, капути и додатоци направени од остатоци од ткаенини.
Consistence соработуваше и со Scabal компанијата, инкорпорирајќи ја нивната ткаенина од 24-каратно злато и живописни волнени дезени.
Yuhan Wang, кинеска дизајнерка која работи и живее во Лондон, ја прикажа својата колекција „The Rose Fist“, инспирирана од жените – боксери. Wang ги спои атлетските и елегантни елементи, со парчиња како боксерски ракавици, украсени со тантела и свилени врвови, како и со обемни влошки за рамениците.
Huishan Zhang, редовен учесник на LFW, настапи со колекција на елегантна дневна облека, надополнета со невообичаени украси, како на пример проѕирни градници стилизирани под фустаните. Од Harrods ја пофалија софистицираната употреба на светки и модни додатоци, истакнувајќи го вниманието на колекцијата кон деталите и разновидноста./М.М.
