Од Balmain до McCartney и Mugler, новите колекции ја реинтерпретираат естетиката на моќта со нагласени раменици, интензивни бои и скулптурни силуети
На ревиите за есен/зима 2026 (FW26) доминира враќање кон модниот израз на 1980-тите, со силен фокус на таканаречениот „statement dressing“. Дизајнерите, според FashionUnited, професионалната платформа фокусирана исклучиво на модната индустрија, повторно ги истакнуваат карактеристичните елементи од таа деценија – нагласени раменици, геометриски и архитектонски силуети, како и богати, jewel-tones бои – со што се гради визуелен јазик на самодоверба, моќ и авторитет.
Трендот директно се надоврзува на наследството на дизајнери како Тиери Муглер, Клод Монтана и Азедин Алаја, кои ја дефинираа естетиката на „power dressing“. Во новите интерпретации, класичните кодови се комбинираат со современи материјали, иновативни конструкции и модерни детали, создавајќи изгледи што ја задржуваат драматичноста, но делуваат актуелно и прилагодено на денешниот контекст.
Колекциите на Balmain, под креативно водство на Антонин Трон, ја нагласуваат силата на силуетата преку прецизни линии, високи вратни кроеви и детални драпирања во пределот на струкот. Кај Costelloe се забележува комбинација на лесни ткаенини со јасно дефинирани рамени структури, додека Luisa Spagnoli нуди елегантни комбинезони во сатен со скулптурно обликувани раменици и нагласен струк.
Mugler, под водство на Мигел Кастро Фреитас, останува верен на препознатливиот визуелен код – со силно изразени раменици и геометриски кроеви – додека Christian Siriano и Stella McCartney го надградуваат трендот со комбинација од класична кројачка прецизност и современа носивост. Valentino и Dolce & Gabbana дополнително ја потенцираат моќната естетика преку силни бои, контрастни детали и силно структурирани парчиња.
Според FashionUnited, трендот го карактеризира и повторното враќање на декоративните елементи во зголемен обем, кои функционираат како централни точки во изгледите. Jewel-tones палетата, како и драматичните кроеви, придонесуваат кон создавање на впечаток на самоувереност и визуелна доминација./M.M.
Фото: FashionUnited, со кредити: Launchmetrics/spotlight и Mugler, Christian Siriano, Stella McCartney, Valentino, Dolce & Gabbana, Balmain FW26
