Ѕвездената екипа и впечатливите модни појавувања ја претворија премиерата во спектакл на стилот
Светската премиера на „Ѓаволот носи Прада 2“ (The Devil Wears Prada 2) штотуку се одржа на 20 април 2026 година во центарот Линколн во Њујорк. Црвениот тепих беше вистински моден спектакл каде што се појавија сите главни ѕвезди: Мерил Стрип, Ен Хатавеј, Емили Блант и Стенли Тучи. Изненадување за публиката беше појавувањето на Лејди Гага, која има камео улога и ја изведува главната песна во филмот.
Премиерата помина во атмосфера на силен медиумски интерес и визуелен спектакл, каде модата, очекувано, ја презеде главната улога. Црвениот тепих беше внимателно режирана сцена што го продолжува естетскиот код на филмот, со доминација на драматични силуети и јасни модни пораки, предводени од главните актерки.
Главното внимание го привлече Ен Хатавеј (Anne Hathaway), која се појави во впечатлива, скулптурална црвена свилена тоалета, со структуриран корсет и тридимензионално плисирано здолниште, додека стајлингот го заокружи со впечатлив накит од Bulgari. Мерил Стрип (Meryl Streep), легендарната уредничка Миранда Пристли, се појави во драматичен црвен плашт, комбиниран со црни ракавици и препознатливи темни очила, потврдувајќи го статусот на лик кој одамна ја надмина рамката на филмот.
Критиките по премиерата на „Ѓаволот носи Прада 2“ се во голема мера позитивни, опишувајќи го филмот како умно стилско продолжение кое успешно ја пренесува магијата на оригиналот во дигиталната ера. Критичарите особено ги фалат изведбите на Мерил Стрип, која брилијантно ја прикажува ранливоста на Миранда Присли пред падот на печатените медиуми, и на Емили Блант, која со својата нова позиција на моќ внесува свежа енергија и хумор. Иако некои забележуваат дека дејството е малку пренатрупано со нови ликови и социјални медиуми, генералниот заклучок е дека филмот е визуелен спектакл со остри дијалози кој заслужено држи висок рејтинг од околу 88% на Rotten Tomatoes.
Премиерата доаѓа по интензивната глобална промотивна турнеја, во рамки на која актерската екипа го претстави филмот во неколку светски модни центри, меѓу кои и Мексико Сити и Шангај. Интересот за продолжението е дополнително засилен и со медиумските појавувања на главните актерки. Мерил Стрип неодамна се појави на насловната страница на Vogue заедно со Ана Винтур, која често се посочува како инспирација за ликот на Миранда Пристли, додека Ен Хатавеј ја доби титулата „Најубава личност“ според People.
Со ваков спектакуларен почеток, „Ѓаволот носи прада 2“ не само што го најавува своето филмско продолжение, туку повторно ја потврдува позицијата на франшизата како редок спој на филм и мода, каде секој јавен настап е дел од внимателно режиран визуелен наратив.
Фото: ФБ на 20th Century Studios
