„Sonic Starquakes“ ја помести границата меѓу науката и модата со фустан во кој светлината реагира на човечкото тело
Париската Haute Couture Week доби едно од своите најнеобични и најсмели модни поглавја со колекцијата „Sonic Starquakes“ на холандската дизајнерка Ирис ван Херпен. Во својата најнова колекција инспирирана од космосот, креаторката позната по поместувањето на границите меѓу модата, науката и уметноста, буквално внесува дел од неговата физика во haute couture.
Централно место во колекцијата има „Helix Nebula“, фустан во кој за првпат плазмата станува дел од високомоден дизајн. Четвртата состојба на материјата, која во природата најчесто се поврзува со ѕвездите, молњите и поларната светлина, е затворена во две закривени цевки од рачно дувано стакло поставени околу рамената. Кога фустанот се активира, светлечките нишки во стаклените елементи реагираат на електромагнетното поле на човечкото тело.
Креацијата е надополнета со 30.000 иридесцентни, рачно дувани стаклени сфери, поставени врз илузионен тул, создавајќи впечаток на светлосни честички или меурчиња што лебдат над телото.
Ефектот е истовремено футуристички и речиси органски – како телото да се наоѓа на границата меѓу материјата и енергијата.
„Sonic Starquakes“ е инспирирана од вибрациите на ѕвездите и од космичките појави што ја откриваат природата на универзумот како постојано движење. Самото име на колекцијата се однесува на пулсирањата на ѕвездите – вибрации што се шират низ нивната внатрешност и откриваат дека и небесните тела имаат свој звук, определен од нивната големина.
Со тоа колекцијата ја продолжува долгогодишната фасцинација на Ирис ван Херпен од невидливите сили што го обликуваат светот. Наместо модата да ја третира како статичен предмет, дизајнерката ја замислува како процес – како нешто што се движи, реагира и се менува во контакт со телото и просторот.
Токму во тоа се состои и нејзината најголема иновација. „Helix Nebula“ не е само фустан со светлосен ефект, туку експеримент со идејата дека облеката може да стане медиум меѓу човекот и енергијата.
Со „Sonic Starquakes“, Ирис ван Херпен повторно ја потврдува својата позиција на една од најрадикалните авторки на современата haute couture. Нејзините креации не се создадени само за да бидат носени, туку и за да постават прашање за тоа каде завршува облеката, а каде започнува уметноста, науката и самата материја. Линк до колекцијата./M.M.
Фото: Iris van Herpen, FB, Instagram,
