Архитектот Диéбедо Франсис Кере создаде дигитален простор што ја раскажува судбината на 600 исчезнати артефакти нагласувајќи ја загубата на културното наследство.
УНЕСКО официјално го претстави Virtual Museum of Stolen Cultural Objects, иновативен дигитален музеј во кој се прикажани 600 културни артефакти што низ годините биле украдени или исчезнати. Автор на проектот е светски познатиот архитект Диéбедо Франсис Кере од Burkina Faso, добитник на наградата Pritzker во 2022 година и основач на берлинското Kéré Architecture.
Музејот претставува глобална кампања за подигнување на свеста за илегалната трговија со културни добра. Артефактите се преземени од базата на International Criminal Police Organization (Interpol), а целта е посетителите да ја почувствуваат тежината од загубата на наследството и значењето на неговото враќање.
Според Кере – архитект што доаѓа од земја која била колонизирана и чии уметнички дела, богатства и историски артефакти биле украдени, целта на проектот била да се потенцира важноста на културното наследство и последиците од неговото исчезнување. Тој нагласува дека овие предмети не се само изложбени експонати, туку често имале практична, духовна и комуникациска улога што ги поврзувала заедниците.
Виртуелниот музеј е претставен во форма на глобус, а по влегувањето во интерфејсот, посетителот се наоѓа во амфитеатар со полукружна структура и премин кон просторијата „Return and Restitution“, посветена на предмети што биле успешно лоцирани и вратени.
Во центарот се извишува спирална форма што ја содржи „Stolen Cultural Objects Gallery“, апстрактна рампа разгранета во зони за различни светски региони. Корисниците можат да прегледуваат кластери од украдени артефакти или да навлезат во регионалните простории обликувани со кружни отвори и горни светлосни куполи кои претставуваат траги што ги оставиле предметите кои исчезнале од своите заедници.
Концептот е инспириран од баобабот, дрвото-симбол на отпорноста и духовниот центар на многу африкански заедници. Иако виртуелниот простор нуди неограничени креативни можности, Кере се стремел кон едноставност и симболика, за дизајнот да биде разбирлив и блиску до искуството на секој посетител. Музејот може да се посети на следниов линк: https://museum.unesco.org/https://museum.unesco.org/
Фотографии: Kéré Architecture
