Од моден спектакл до софистицирана класика: Emily in Paris во ново стилско поглавје
Во петтото продолжение на серијата Emily in Paris, гардеробата на Emily Cooper повторно е во фокусот на модните магазини, кои детално ги мапираат парчињата што таа ги носи и местата каде можат да се најдат. Модата и овој пат е еден од клучните наративни елементи на серијата, а интересот на публиката не е насочен само кон изгледите на екранот, туку и кон нивната реална достапност.
Во петтата сезона, Emily in Paris се оддалечува од екстраваганцијата и се доближува до чистиот, софистициран париски стил. Гардеробата на Emily Cooper доживува јасна стилска еволуција, напуштајќи ја претераната, речиси костимографска екстраваганција од претходните сезони и насочувајќи се кон порафиниран и созреан моден израз.
Новото стилско поглавје на една од најгледаните серии на Netflix, според анализите на модните магазини, меѓу кои и ELLE, носи силен фокус на чисти линии, прецизен крој и квалитетни материјали. Аутфитите се подеднакво впечатливи на екран и носливи во реалниот живот, што дополнително ја објаснува нивната популарност и честата појава во shopping guide содржини.
Во центарот на модната приказна се кроени блејзери со нагласени раменици (Dior, Balmain), елегантни свилени и сатенски фустани во интензивни, но софистицирани бои (Gucci, Valentino), модерно интерпретирани твид комплети инспирирани од класичната париска естетика (Chanel, Miu Miu), како и trench coat модели со суптилни, но впечатливи дизајнерски детали (Burberry, Max Mara).
Целокупната гардероба во петтото продолжение ја прикажува хероината како стилски посигурна и поинтегрирана во европското модно милје, со јасен акцент на инвестициони парчиња што градат долгорочен стил, наместо моментален визуелен ефект./М.М.
Извор на фотографии: Netflix
