Љубов или стратегија: Џеф Безос наводно го подарува „Vogue“ на Лорен Санчез
Бракот на еден од најбогатите луѓе во светот, Џеф Безос, со новата избраничка Лорен Санчез повторно е во фокусот на јавноста, откако започнаа шпекулации дека Безос размислува да ѝ ја подари модната библија „Vogue“ како невестински подарок.
Гласините добија на интензитет по неодамнешната насловна страна на Санчез за дигиталното издание на „Vogue“, на која таа носи венчаница од Dolce & Gabbana, внимателно избрана од легендарната главна уредничка Ана Винтур. Овој потег дојде само неколку недели по најавата на Винтур дека се повлекува од функцијата главен и одговорен уредник на списанието, позиција која ја држеше цели 37 години.
Според извештај на британскиот *Daily Mail*, Безос наводно преговара за купување на компанијата „Condé Nast“, издавачот на „Vogue“. Доколку информацијата се покаже точна, тоа би значело дека сопственикот на „Amazon“ би станал и сопственик на највлијателното модно списание во светот — симбол на гламурот и елитната култура.
Семејството Њухаус, кое ја поседува „Condé Nast“ преку компанијата „Advance Publications“ уште од 1959 година, досега тврдеше дека нивните медиумски брендови не се на продажба. Но, последните случувања во медиумскиот гигант — масовни отпуштања на глобално ниво, како и затворањето на канцелариите на „Vogue“ на плоштадот Хановер во Лондон и нивната преселба во обичен ко-воркинг простор во близина на Ватерло — ги поттикнаа шпекулациите за можни големи промени.
Иако официјална потврда за евентуалната аквизиција сè уште нема, модниот свет внимателно го следи развојот на настаните, додека медиумите се прашуваат: дали станува збор за љубовен гест или за нова стратегија на Безос за влез во светот на луксузната медиумска индустрија.
Фото: ФБ
