Првиот специјализиран саем за медицина, стоматологија и фармација во организација на Комората на приватно здравство ќе биде одржан на 8 и 9 ноември во хотел „Александар Палас“ , во Скопје.
Комората на приватно здравство го најавува првото издание на Health Innovation Expo 2025 – Саем за медицина, стоматологија и фармација, што ќе се одржи на 8 и 9 ноември во хотел „Александар Палас“, во Скопје. Настанот претставува нова платформа за поврзување на медицината со технолошките иновации и ќе биде посветен на дигитализацијата во здравството, вештачката интелигенција и телемедицината.
Организаторите истакнуваат дека Health Innovation Expo 2025 е првиот настан од ваков вид што го организира Комората и дека целта е да се отвори простор за размена на искуства, знаења и технолошки решенија кои ќе го унапредат секојдневното работење на здравствените професионалци.
Главниот акцент на програмата ќе биде ставен на правилната примена на вештачката интелигенција во клиничката пракса, нејзината улога во оптимизација на дијагностиката и терапијата, како и во подобрување на ефикасноста на здравствените услуги.
На настанот ќе учествуваат експерти, компании и институции кои ќе ги претстават своите иновативни решенија преку јавни трибини, предавања и саемски презентации. Според најавите, се очекува богата понуда на технологии и производи наменети за повеќе од 5.500 приватни здравствени установи, над 30.000 здравствени работници во приватниот сектор и повеќе од 33.000 вработени во јавниот здравствен систем.
Health Innovation Expo 2025 има амбиција да стане годишна точка за средба на медицината и иновациите, со јасна визија за иднината на здравствениот систем во Македонија.
Комора на приватно здравство
