Здружението за истражување, заштита и промоција на културното наследство ВУЛГУС, од Скопје, во Националната галерија во Скопје, во објектот Мала станица, на 17 јуни, со почеток во 20 часот, организира отворање на изложбата Aeterna Nova.
AeternaNova (кованица од латинските термини “вечна” и “нова”) е мултимедијална изложба, посветена на културата на облекувањето на сите етнички заедници кои живеат во Македонија. Презентирана е културата на облекувањето од крајот на 19-от и почетокот на 20-от век, како мода, наместо како традиција.
Црпејќи инспирација од Camera Lucida на Роланд Бартс, оваа изложба се служи со неговите концепти наречени studium и punctum за да ја артикулира дуалната природа на фотографската интерпретација. Конкретно, во ова видување, studium-от реферира на историското и културното значење на народните носии, односно модни избори направени од локалното население кои евоцираат културни и општествени норми.
Со претставување на овие костими како насловни страници на модни списанија, изложбата воведува punctum, односно современа реинтерпретација која ги повикува гледачите да ги согледаат овие артефакти надвор од нивниот конвенционален контекст. Овој пристап не само што ја демистифицира поврзаноста на народните носии со патриотизмот, национализмот и патријархалното угнетување, туку ги претставува како симболи на индивидуална и заедничка креативност.
Потенцирајќи ја сложената изработка на самоуките креатори на овие костими, изложбата им оддава почит и сугерира дека овие традиционални вештини треба да се ценат не само поради нивната историска вредност, туку како трајни изрази на културниот идентитет и креативноста на луѓето од едно минато време.
Проектен тим: Филип Петковски, куратор и режисер, Марко Марјановиќ и Жарко Чулиќ фотографи и Ивана Мојсовска Головска, постпродукција на фотографија.
Во изложбата се користени народни носии од колекциите на Костадин Балкански, Дамјан Ристовски, Ансамбл “Студио Фолклор” и Фолклорно студио “Етнос”.
Проектот е финансиран од Министерството за култура на РС Македонија.
