Силвија Фенди (Silvia Fendi) создаде интимна, носталгична и впечатлива женска колекција инспирирана од личен момент, но насочена кон современата жена.
Во најновиот лукбук за „Fendi Resort 2026“, дизајнерката Силвија Фенди претставува 37 креации што ја раскажуваат приказната за едно минато време низ современата призма на модата. Колекцијата претставува лично патување назад, во еден момент од 1983 година кога таа, заедно со Карл Лагерфелд (Karl Lagerfeld) позирала во Монте Карло, носејќи фустан со точки и карактеристичен пеплум — креација што ја носела во славните ноќни клубови на тој период.
Враќањето на таа слика беше предизвикано од откритието на истиот фустан од страна на нејзината внука — чин кој не само што ја разбуди носталгијата, туку и ја инспирираше Фенди да создаде современа верзија на таа енергија и радост. Модернизацијата е суптилна, но значајна: во новата варијанта, во набраните детали е вметнат џеб за мобилен телефон, а лесната парашут свила како главен материјал додава практичност и леснотија.
Иако Силвија Фенди со децении го води машкиот дел на брендот, оваа колекција го означува нејзиното значајно присуство во дизајнот за жени во рамки на LVMH, рамо до рамо со други влијателни дизајнери. Мотивот на ноќниот молец — симболично суштество кое се стреми кон светлина — се претвора во визуелен и текстурен потпис на колекцијата, преку експерименти со интарзија во кожа, принтови на кошули и плисирани здолништа, но и везови на фустани со светкави детали.
Колекцијата се одликува со балансиран спој на елегантна лежерност и прецизна конструкција. Опуштените кроеви со куси панталони и мини здолништа со набори се надополнети со силуети во свилена тафта — од панталони и фустани до јакни инспирирани од воен стил со двојни патенти. Иконското двојно-F лого на Фенди се појавува дискретно, вешто вткаено во џинс со препознатлива вештина.
Посебно внимание е посветено на додатоците: богато украсени Baguette и Spy чанти, нов пригодлив tote модел, како и мали, шармантни Baby Baguette чантички — совршен детал за динамичната урбана жена.
„Навистина уживам во тоа што сега работам и за мажи и за жени — тоа ми носи рамнотежа и инспирација“, вели Силвија Фенди. Токму таа среќа и страст се чувствуваат низ секој изглед од оваа исклучително лична, но универзално допадлива колекција./М.М.
